AU DOHOT OMPUNGKU

  

MARANGKA MARANGGI 

 

Atia juguk sada-sada au di karosi nai jolo bagas tai ale dongan-dongan pangaranto, ima di ari ahad na solpu antargan so kotu magorib, inda binoto arani sanga aha, taringot au atia dompak menek di hita an. Maso i umurku lima taon dope, inda pe sikola, hum na marmayam sajo maia tohap niba manyogot na potang. Somal dei dohot dongan-dongan sapangkek niba rap mandehe di batang aek an, mambuat apundung atope manggis tu arang-karangan nai dolok, mardopang-dopang pake sinapang bulu pelorna mutik ni jambu, marbandol di toru-toru ni batang ni kojean, palanga marsimonjap di potang ni ari. Arani tagina na marmayam i rap dohot dongan-dongan, dodas dei lupa iba sumbayang kotu luhur dohot kotu asar. Umak niba pe pupu dei manjalak-jalaki iba tu jae-julu, oni dung pasuo matubek-bek mei arani sasadari iba na maor i. Ambaen milas ni roa ni umak niba, bolnang mei mata nia tu iba, oni i sibitkon ia muse mei iba, palanga i puloskon ia pusot niba, get menetek doma ilu niba manaonkon hancitna. Ulang ba nangkan binoto ayah niba muse na marmayam sajo iba sasadari, na doseng muse mei lidi tu urut niba, alale … murmur markoti. Songonipeba, incogot na lupa mei iba i, na maor muse mei mulak karejo niba sasadari. Olodantong, petomantong si Lian alak Mandailing na mian di tano omas sigumorsing.  

sepeda jantanMuda ari Sabtu najopan roangku i, arana manyogot dope ari, romei ompungku marlereng sian huta asal nami mangalap au tu bagas nami sannari di Pasendeng. Dung maridi, juguk ma au i di tangga bagas nami i painte-inte ompungku. Bope nian maso i madung bahat kalak na marlereng di amian, taiba anggo sora ni kiring-kiring ni lereng ni ompungku muda ipalu ia marbeso do terbege dohot alak na lain. Dao dope sian bagas nami i, muda dung ubege sora ni kiring-kiring ni lereng ni ompungki, bulus jongjong ma au i: “Maro Ompung”, ninna mei dibagasan roangku. Manombo, ambaen ancitna ulala nai sibitkon ni umak i sajo atope arani i gusari ayah au muda adong salangku, bulus mangadu mei au tu ompungku. Indabeda, anggo ompungku pe na mangamuk mei, i tojankon ia bageng mei losung, oni irambankon ia muse mei indalu nai tu taruma bagas nami i. Sampe sannari leng na uingot dope boto nai pardok ompungki muda dompak mangamuk: “Ma piga kali u dok, ulang se nai parkanciti amu anggingki !!!” Anggo ayah dohot umakku pe na monjap mei alai nadua i bilik ambaen biarna, indabe na barani alai kaluar bagas pasuo dohot ompungku. “Sada-sada !!!”, ima na ro obar dibagasan roangku, oni mikim muse aun’tong.

kakek-5Dung tarpalan ilala ompungku, i ompa ia ma au i, dungi i pajuguk ia ma au i di boncengan ni lereng nia i. Dungi dorong ia lereng nia i dua-tolu langka, bulus i panaek ia ma lereng i salaos mangguncang na. Ami pe kehe ma marlereng marpalan-palan tu poken Hutanopan sian topi-topi ni dalan godang i. Lalu tu poken, songon na biaso, i pasahat ompungku mei lereng nia i di amangboru Jamarombun, na marjagal timbako dohot pusuk nai lambung parbantean na i lombang. Salose pasahat lereng, i togu-togu ompungku mei au lao tu dolok torus tu parjagalan ni Umak Umbik nai topi balerong i. Tolap tu si, i paido ompungku mantong pocal dua tapak, lomang opat korot, oni cendor dua mangkuk. Indape nai aumkon boto pocal dohot lomang i tu papangan niba, mudung ro mei ijur niba di bagasan baba niba, mariari tarsiak muse nida pocal i. Indabeda, dung abis tarpangan pocal dohot lomang i, oni minum cendor muse dungi, ompungku pe ngada tarantai ia be, na bulus torap ma ia ambaen butongna. Anggo au leng marpupu merdet monmonku arani siakna boto pocal ni Umak Umbik i. Dung salose namangankon i, i oban ompungku ma au maor di poken i, satongkin-satongkin maradian atia pasuo ompungku dohot koum-sisolkot nia, rap mangeceti oni sasakali rap mekkel,  ra musengtong mangkair sasaulak. Anggo ompungku da, asal do pasuo dohot sitandaan nia, inda na lupa ia patandaonsa bahaso au paompu nia: “Olo, on ma paompu na godang na, gorar na si Lomo !!”, ninna sajo mei mandok koum-sisolkot nia i patidaon godang ni roana.

Muda tu poken au dohot ompungku, adong sajo dei nai ida ni mata nia ambaen di au. Indape na malap-lap sipatu niba, na get i tabusi ia muse mei sipatu niba na baru. Imada so goyakna roa ni ayahku paida-ida ompungku: “Ulang na sai paenjeng ayah si Lian, sanga inda jadi alak ia saulak on !!!” Ning ayahku mei mandok ompungku. Ro ning ompungku: “Gorarna pe anggingku, roa-roangku songoni !!!” Muda tu umakku dodas dei ompungku mandok: “Ulang sei sibitkon paompungki, maen !!!”. “Olo amangboru !!!” Ning umakku songoni pamalum roa ni ompungku. “Olo … olo … olo … ningmu maen, tai leng nai pisatkon ko juo do u ida, ligima pusot ni si Lomo leng na rata dope u ida !!!”. Ning ompungku muse. Sip tong umakku songoni, ipalalu ia karejo nia. “Goso jo isi bayo na muap tano !!!”, aropku tarsongon i ma na dong dibagasan roa ni umakku.

Allohu akbarAllohu akbar … tarbege bahang sian masojid. Bo, magorib ma rupa. Dungi jonjong au sian jugukanki, torus lao marpalan-palan tu balakang get manjawek. Dung salose manjawek leng na adong do boto na solot di bagasan roangku: ”Aso mei so songoni luai ke !!! Ayah ni ayahku udok ompung, sabalikna ompungku mandok au anggi, na marangka maranggi do luai au dohot ompungku ?!!”

 

Gandoang, 1 Juni 2009

by edi nasution

9 Komentar pada “AU DOHOT OMPUNGKU”

  1. SDP Nasution Says:

    Marangka maranggi arani ompung dohot paompuna, marangka maranggi arani sa ama sa ina,
    marangka maranggi arani sa kahanggi
    marangka maranggi arani marangkamaranggi ama

    Mang songon i rupa adat ni Halak Mandailing sian na Robi.

    Na tagi ma nar Ompung i, tele…!!!

  2. nelfa Says:

    malungun au tu ompung ku.. (T-T)

  3. Muhammad Sofwan Says:

    Bang Edi,

    Kita boleh kenalan lebih lanjut?

    Kalau boleh tolong email ke, sofwan.muhammad@mail.com

    Salam
    Sofwan

    • edi nasution Says:

      Salam kenal juga kahanggi, kami berasal dari kampung Gunungtua-Muarasoro, Kotanopan-Mandailing Julu, sekarang menetap di Cileungsi-Bogor, bolehlah kita kontak2 via FB aja, terima kasih atas kunjungannya, sukses selalu, amin.

  4. musaddat lubis Says:

    Na pas mantong carito on songon pengalamn niba diwaktu menek di kampung dohot ompung niba. Tola do iba baya marsapa, aso do ompung niba mamio anggi tu iba, padahal ompung I ayah ni ayah niba.

  5. syafaruddin Lubis Says:

    Hem…muarasoro


  6. Tagi do mambacna da, taringot di atia menek ,mandehe udang di Batang Batahan.


  7. Napas madai carito mi kahanggi…taringot iba di ari2 nasolpui,,botul mada binege,songon naolongan do dabo roa niompung nibai diba,tai sabotulna orangtua nibai peda nalobi olong dei roa nialai di ita dompak menek,cuma sanga sngn dia sojadi alak namanangion dop marfikir dei ita i,,memang sonima rupa cara ni alak kt mangajari pomparna,tai boto amu inda tarbaen sngn pangajari ni orangtuantaibe tu anak niba,harani madung marbeda maso dot zaman na,,sonnari tarida kadang na karasan doma pompar sonnari umpado amang dot inangna,tai namaua i da,mdh2n nian alai pomparontai saulakon manjadi alak namarguna ma nian di agamana sonni tu amang inangna songoni muse di masyarakatna baik marnegara na,,salam kenal mada sian ami nai daerah maga dan sekitarna..wassalam


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s


%d blogger menyukai ini: