MARENDE-ENDE

 

1. diaru Berkata
Desember 4, 2008 pada 3:25 am

Assalamualaikum.wr wb.

Olo mada….. Manombo da mala ro lungun ni roha tu ita an, i sompat kon do da manyurat-nyurat kon isi ni ate-ate, ampot muse adong jaotan ni na di sutarkon juo do da di son ampot baya adong gunana :

“ANDIGAN DOPE ?”
oleh : Diaru Parlindungan

Mala sugari ulang be sugari
Poda dohot bisuk inda be ia di pa pudi
Sadarion ngada songon na tuari
Marsiopkopan doma tu pudian ni ari

Ale… tunas ni Mandailing
Ho na bisuk na lambok di pangkuling
Mangatak mangetong so adong tanding
Tu na pade na so ra tading

On mada harop na di haropkon
Ulang be gut-gut si patujolohon
Mandailing na polit inda be begeon
Mar raja di ulu ni tot na angkon do da di agohon

Ampot muse, ra do da ita talu
Jogal ni roha ulang be di palalau
Parsadaan doma ita patogu
Bahat mangalehen do da ha sonangn di na mangolu

wassalam.

Balas

2. edinasution Berkata
Desember 4, 2008 pada 3:56 am

Amang … na sonting mada ende-ende nai ke !!!
Adope ita pupu bo marende-ende on, so ulang mago uti-utian ni bangso i.

Muda dompak lotok ale Aek Singolot
Mulak tu bagas leng sandang abit maridi
Muda ita sude ningkuda namarkoum-sisolkot
Sangap marmora elek marboru manat-manat markahanggi

Balas

3. diaru Berkata
Desember 10, 2008 pada 4:17 am

Assalamualaikum.wr.wb.

Godang do da harop ni ba, Uda i Edi Nasution totop dibagasan ni hairasan , inda adong na mancit inda adong na mantul songoni juo tu hita na mar si holong ni roha tu ha bincaran na ima tano Mandailing. Mala ita talihon tu huta madung tar songon mar si pature di ibana be, inda be songon na jolo rubuk sa tahi saoloan , rosu di na mar dongan. Arani holong do da di surat hon aha na di roha, ampot adong baya guna na.

” Na di rohang ki ”

oleh: Diaru Parlindungan.

Ampot baya tu aduan ni ari
Gorar mi pe inda be binoto
Um carito doma na tading di na par pudi
Surat tulak-tulak i bahat so mamboto

Tano na tumbur do da tano mu
Inda adong luak sadeges ni tompa mu
Na tarbonggal do da tu jae rongkon tu julu
Agama pe tumbur i tiop togu

Nian banua ni Mandailing
Angan na so mar tanding

Ma i dia ma ale hata-hata si paingot na jolo i
Obanon aduan tu pudi ni ari
Rumbuk di na mar koum mar kahanggi
Amanah ni bangso i di ita on do da sa on nari

Lilu saou ni ari um gonan pado aduan
Mare mada ita mar si tailian
Falsafah ni na mar koum ita padenggan
Na ni dok sa tahi dohot saoloan gabe sapadan

Wassalam.

Balas

4. diaru Berkata
Desember 10, 2008 pada 5:11 am

” Elek di na mar husip ”

Mar tulilla pa botohon tu dongan
Di son do ahu da madung di pamispisan
Painte habar dohot jawaban
Bia do ale ita on tu aduan

Anggo ahu da inda be manjalahi
Ho do da anggi na u pili
Baen dongan tu pudi ni ari
Pandok ni halak ,Se hidup se mati

Mabang da anggi ambaroba
Na songgop di bulung ni tobu
Ho do da anggi giot ni roha niba
Intean do iba di alus muyu

Dok bo anggi dokonon mu
Mala na olo do ho di au
Janji doma rap ita pa togu
Ulang baya sugari na so lalu

Balas

5. edi nasution Berkata
Desember 10, 2008 pada 5:41 am

Olo da bayo suti na bisuk
Pomparan ni Sutan Diaru na martua sapanjang
Incogot-aduan hamu doma husuk
So ulang be ita sai na maredang-edang

Sian Kotanopan ale tu Panyabungan
Baris do le batang ni jior paradianan
Bope inda sompat dope marsiulangan
Asal ma ita leng na markairasan

Balas

6. diaru Berkata
Desember 12, 2008 pada 9:20 am

Alus na…..

Magodang aek mangayupkon soban
mula manopi baen pagara ni api
Magodang tu gorar ampot inda taroban
Uda Edi do da ning iba na um mangarti

Tor si pira manuk parjalangan ni horbo
Sampe tu sipaga-paga panjampalanna
Tar dok do iba baya na urang boto
Umpe dapot mangan baya di pandaramanna

Marpadati na jolo kehe tu pasar
mangoban boal si gadis on
Mar santabi iba, Uda ulang gusar
Na so mar sinaloan do da iba on

Di ro ni udan mar aek ma da panggurisan
Na angkan pusuk doma da idupon
Olo mada Uda, ita angkon do mar hairasan
Bope na sibuk na si adopon

Balas

7. edi nasution Berkata
Desember 12, 2008 pada 10:44 am

antusanna:

Aek Mata ale di Mandailing Godang
Aek Singangir baya di Mandailing Julu
Muloi ma ulala marngaolan sude pamatang
Arani lajana mangomo ale pae-paulu

Balas

8. Asharuddin Nasution Berkata
Desember 15, 2008 pada 5:42 pm

Aslkm..Adong do ale tarombo na dung i patidaon di blog on? Pala adong, marga aha i? Au Nasution sian Mompang Julu do. Tapi nda unjung u etong-etong sanga katurunan papigana ba.

Balas

9. edinasution Berkata
Desember 15, 2008 pada 11:52 pm

Wa’alaikum salam. Inda adong boto “tarombo” di son. Sarupo dot kahanggi i, ami pe na mian di Julu an inda na mamboto sanga madung piga sundut. Rap markairasan be ma ita suden nian, amin !!!

Balas

10. Asharuddin Naution Berkata
Desember 16, 2008 pada 5:23 am

Tapi i bagas u ida adong do taromba na i simpan ni Ayah. Mungkin lain waktu bisa u kirim tu udai i.

Balas

11, ISN Berkata
Oktober 6, 2009 pada 3:26 pm

bisa sdr kirim tarombo nasution mompang,saya mau bertukar pikiran ttg silsilah nasution asal mompang dan malintang,klo bisa kirim ya ke mail saya iskandar_setya@yahoo.com atau kirim no hp sdr ke mail saya,

Balas

12, diaru Berkata
Desember 16, 2008 pada 7:08 am

Olo mada ale Uda…….

Inda na manyosali aha na didokon
Madung bagian do da si obanon
Pamatang na marngaolan dapot di taon
Mangulai si ula on angkon do da dihutamohon

Landit ni dalan mala par udan
Kehe tu kobun ma biar tar sulandit
Mala na angkan baen tu aduan
Angkon di taonkon do da bope na mancit

Di na malungun tong do da hu jalahi
“etek mulo ni gondang” i di dia do lua i
Na giot marsuo ning roha dohot Uda i
Ampot baya tar jalin silaturrahmi

Horas….Uda…

Balas

13. edi nasution Berkata
Desember 16, 2008 pada 8:22 am

Poken siri-siri baya di potang ni ari
jeges tarida hatiha habang margiri-giri
Muda nangkan ro do le ningmu mangulangi
Bukak do pintu ni bagasta tiop ari

Balas

14. diaru Berkata
Desember 18, 2008 pada 9:16 am

“Tarimokasi mada Uda
Di dia do luai bagas godang parsinaungan i
Na so binoto do da alamat na
An si binoto ma nian sugari.”


Tama-tamba ni basa-basa do da on
Gatal-gatal ni tangan manyuratkon
Ampot adong antong na tarpargunaon
Mala naso denggan ulang jadi si ingoton

Na dia ma i ale gatal-gatal ni tangan i ?

***************

Madung do da dao pardalanan
Manjalai bisuk dohot sinaloan
Mangadu nasib di pangarantoan
So dumenggan ma nian pancarian

Aha ma le na ni opkop ?
Inda lain da ridho ni Tuhan
Ajaran ni Rosul kon togu di tiop
Ampot sarugo baya bagian ta sangandigan

Na dung tangkas do da na angkan marugi
Di na so ingot mar si paingotan
Mala na giot do ita di labo na jaji
Ilmu sobar angkon di oban

Ya bo laning taida raja nami
Bope kaha anggi dohot anakboru i
Mare ma hita mangido tu Tuhan Na Sada i
Tuhan naso mar daganak na mar dadaboru i

Na dung diatak di etong Na lang ka ni jolma
Mambolo paihutkon giot ni rohan ta
Na mangatur di sagala na muba
Ulang hita les hurang kurangan di pangalehen Na

Loja mangaruncur tolap tu panangkokan
Manjalai sopo ingan paradianan
Ate-ate na mapicur arani urang ni Iman
Ampot ita urang ingot mar sipaingotan

Mala dung sobar angkon do sobar
Sobar di na mangalehen dohot agoan
Na sonang na hancit angkan digarar
Si jagiton ta ma da i di ari pambalosan

Tarsai mada jolo…….

Balas

15. edi nasution Berkata
Desember 19, 2008 pada 12:46 am

Na sonting mada baya pinompar ni Sutan Diaru on
Dina marende-ende patidaon bontar dot ias ni ate-ate
Na bahat sipaingot atope ajaran na pade so rap ita obankon
Di hangoluan ta di Portibi on sampe incogot-aduan ita mate

I mada pade mai ita rap marsiulang-ulangan
Ido paradatan ni alak kita na markoum-sisolkot
Bukak do da bole pintu ni bagas ta so ita marsijalangan
Boti aha nai bagasan ni roa so ulang be leng solot

Balas

16. diaru Berkata
Desember 22, 2008 pada 3:53 am

“Mandailing Marsalawat”

Allohummasholli’ala Saidina Muhammad
Inda adong be da jolma na um hebat
Tu iba na ma ita mangido safa’at
Di ari aduan mudah-mudahan hita salamat

Allohummasholli’ala Saidina Muhammad
Na ringgas halak na, na go go mar ibadat
Na denggan baya dibagasan martabi’at
Sude halak mangalehen hormat

Allohummasholli’ala Saidina Muhammad
Inda da na taralo di na maribadat
Di tongqa borngin pe di jongjongkon do da sholat
So adong hurang na di na marnasihat

Allohummasholli’ala Saidina Muhammad
Ya Robbi sholli ‘alihi wa sallam…..

Yabo ale ummat ni Muhammad
Ampot baya bahat sala na ita buat
Tu ibana doda hita on mangido safa’at
Pahalo na sa otik so mur ma bahat

Nga antong bininoto da ummat ni Muhammad
Adope bo dongan ulang hita tarlambat
Ita jongjongkon mada sholat
Ulang tarlambat dina mar taubat

Oo… ale ummat ni Muhammad
Bahat-bahat ma ita mambaca shalawat
Mare ma ita mar munajat
So les totop ita jadi ummat ni Muhammad

Allohummasholli wa sallim wabarik’alai

Balas

17. edi nasution Berkata
Desember 22, 2008 pada 4:29 am

Oloda kahanggi na denggan roa
Imada so didok halak kita
Adat hombar dohot ugamo
So ulang kita marsimomo

Balas

18. diaru Berkata
Desember 31, 2008 pada 11:42 am

Assalamualaikum.wr.wb.

Ya bo ale ari , taon dohot maso
Inda da na tar antai pardalanan na
Mangaruncur songon i so taraso
Madung mar ujung muse ma ita rupa na

Sabulan songon sataon
Sapoken songon sadari
Taon na ro dohot dope ita luai on ?
Rap ita ingot ma ari na par pudi !

Songon i mada ale dongan sa habincaran
Ulang be ita marsianyang sian on tu aduan
Na so binoto do da di bagian
Ise na par jolo tu roburan nan

Na ingot mar si paingoton do on da koum nami….

Santabi.

Wassalam.

Balas

19. edinasution Berkata
Januari 6, 2009 pada 4:34 am

Abis poken baya paulu mulak tu Simangambat
Maripas-ipas sidegeon so ulang jabat golap ari
Inda tarsarak boto ale ningna adat dohot ibadat
Imada antusan ni ende-ende muyu nangkinondi

Balas

20. diaru Berkata
Januari 6, 2009 pada 5:55 am

Assalamualaikum.wr.wb.

Olo mada Angkang……

Jolo mangomo so marsikola
Mo mo manarimo um copat tamat
Na so marugamo inda na tola
Na marugamo do da na maradat

Magodang pamatang arani pinangan
Manual bisuk pangisi ni indora
Martontang pandang arani hahurangan
Mur marbisuk di na mur ma mora

Manyuat eme gonan di pa lobi
Mala hurang angkon di tamba i
Gorar na adat aturan sian na robi
Mala na so sumbayang ngolu so mararti

Manggadis jagal angkon di timbang
Mangalehen pangulak ulang di hura i
Mangais amal an so saimbang
Mambaen di ita mulak naron tu pudi ni ari

wassalam.

Balas

21. edi nasution Berkata
Januari 6, 2009 pada 7:17 am

I tindo ale tu dolok pangpang baris tor pangolat
I taili muse tu lombang ama na bahat paya-paya
Muda pengaroai leng pupu dope marrarat-rarat
Ringgas sumbayang so murmalanom parkupia

Balas

22. diaru Berkata
Januari 9, 2009 pada 8:57 am

Assalamualaikum.wr.wb.

yabo ale angkang ku……

Sian media ni angkang on iba paingot diri
Ampot baya murmadonok iba tu Ibana
Songoni juo tu koum – koum nami
Ampot adong baya manfa’at na

Mangido izin do da iba di na sa on lolot
Ampot baya na so pas do na di baen on
Di na marpantun-pantun mar sipaingot
Na sa salero do ita luai on ?

Baya ampot na pajauk – jauk kon
Dina marsiapingot – ingotan di hangoluan
Topi ni hatiha na angkan hita topot kon
Na ma biar katinggalan do da iba di paribadatan

Songoni juo do da na mar si do’a – do’a an
Rap hiras be nian hita da koum nami
Rap marsipaingotan bo pe na mar dao – dao an
Tarsongoni do da sipaingot ni na tobang tai

wassalam.

Balas

23. edi nasution Berkata
Januari 9, 2009 pada 9:59 am

Ulang i pangan ambasang na mata
Annon baya mancit muse bitua
Marsipaingot-ingotan do da ita
I ma tando olong ni roa

Ita ingot dope ale abit Sutra
Sian Tiongkok mada i asalna
Na simbur mada ita sannari di tano rura
Get jadi Propinsi Sumatera Tenggara

Balas

24. diaru Berkata
Januari 12, 2009 pada 3:49 am

Assalamualaikum.wr.wb.

Ilu ni ise na so marabur
So adong sala so adong dosa na
Bahat daganak angkan tu kubur
Madung tarjadi muse di Palestina

Sai doma da tos ni roha
Pabege – bege aha na tar jadi
Bahat daganak agoan ama ina na
Arani kekejaman ni Jahudi

Sugari antong donok tu sadu
Ilangkahon do da si manjojak
Ampot tolap iba mangapus ilu
Mangapoi roha-roha na marsak

Tai songon dia do ma binaen
Go-go dohot maso inda mangizinkon
Ampot adong na bisa di lehen
Si lamoton dohot ubat ita pa obankon

Ooo… ale koum si solkot nami
Ulang sugari ita dapotan di pudi
Mangido do’a ita mar rami-rami
Ita patidahon rohanta di halahi

Wassalam

Balas

25. edi nasution Berkata
Januari 12, 2009 pada 6:28 am

Bulu soma ale bulu tumpat
Bahat do da tubu di tano rura
Muda tu Gaza indape sompat
Pinomat mada ita kirim do’a

Balas

26. diaru Berkata
Januari 19, 2009 pada 9:20 am

Muda tu Gaza indape sompat
Pinomat mada ita kirim do’a
Tu na pade ulang ita tarlambat
Rasoki bope saotik dikirim juo do da

Balas

27. diaru Berkata
Maret 31, 2009 pada 10:39 am

Assalamualaikum.wr.wb.

Mang songon dia do luai barita
Na dompah hita dalani di hangoluan ta
Ara ni maso do da na suada
On dope iba sompat ma masa-masa

Mala na angkan tubu ma kamus ni hata Mandailing
Na mambaen na so malo gabe bisa mangkuling
Dohot aksara tulak-tulak na ulang sugari tading
Jadi ubat nguas di milas na maninggoring

wasslalam.

Balas

28. edi nasution Berkata
Maret 31, 2009 pada 12:58 pm

Biaso-biaso do da anggi
I painte-inte bo haroro muyu
On dope rupa mungkap mulaki
Adong namalungun di amu

Olo … rap ita doahkon mada laning
So jadi ita patutonga budayanta
Surat tulak-tulak dohot saro Mandailing
So adong lehenon tu pinomparta

Balas

29. diaru Berkata
April 1, 2009 pada 5:04 am

Olo mada tutu mai da angkang
Andigan dope antong ita pagodang
Inda baen harani indora na di pakombang
Na so marpambinotoan do da na jadi pantang

Mang sai jaji ita ligi
Songon i juo iba rongkon koum kahanggi
Na hurang boto angkon do da i pauli
So marsinaloan baya iba on tu pudi niari

Hombang ni amak di pantar tonga
Songon i juo do da hombang ni roha
Mangharopkon kamus inganan marsapa
Ampot baya so adong parbinotoan niba

Gorar na gadubang angkon do da marpasi
Di godang ni usaho ni angkang dohot do da iba martarimokasi.

Balas

30. edi nasution Berkata
April 1, 2009 pada 11:59 am

Ngada taretong baya incor tali-tali
Atia paudur-udur kalai tu jae-julu
Imada so leng rap ita pasari-sari
Anso lalu karejo boti inda poning ulu

Balas

31. diaru Berkata
April 6, 2009 pada 4:13 am

olo da angkang……

Etek do mulo ni gondang
Jangat mangalusi kudong-kudong
Ngon na menek do da so magodang
Mang songoni saro na antong

Orbo bara orbo padati
Mangoban pusuk sa tiop ari
Olo mada i pasari – sari
Na um bisuk do da na um mangarti

Ngon aek godang tu porsea
Manyogot marangkat so tibu lalu
Di ho mada angkang ami purcaya
Taringot di kamus na angkan tubu

Balas

32. edi nasution Berkata
April 6, 2009 pada 7:01 am

Inda bale ami na mambaensa
Koumta do na sian tor Sijanggut
Bope songon i jop do roa boto mangidasa
Inda muse iba nian marnyungut-nyungut

Balas

33. diaru Berkata
Mei 7, 2009 pada 7:29 am

Carito ni manfa’at
Diharopkon do da dohot sabahat ni hormat
Tu angkang ulang ma nian manjadi sabat
Songon na ita ida na marsapa pe mur mabahat

Aha do luai langa ?
So adong koum ta di Malaka
Songon dia do carito na ?
Por do da roha niba mamboto sa

Ning na deba muse Mandailing dos dohot Batak
Mambegesa dohot do ngadol niba maturatak
Ulang sugari carito i binege ngon kalak
Gorar na halak mandailing anso ulang masopak

Ya bo angkang na job basa
Di painte do da hatiha na
Anso lopeh harop ni si parsapa
So ulang be nian ita on gapa-gapa

Santabi Angkang ku…..

Na sada do da Bungkulan ni Mandailing bope di dia pandaraman na ,” Songon siala sampagul rap tu ginjang rap tu toru mala mergulu saulak lalu. ”

Boti ma da .

Horas Mandailing

Balas

34. edi nasution Berkata
Mei 7, 2009 pada 9:41 am

Alus nami …

Songon dia mantong u dokon jamu kahanggi
Ngadahe arani lale ni ita sude juo dei
Anso songon i na tarjadi
Sian na jolo santak sannari

Na jolo dung do tarsurat di sada pustaha
Ima Nagara Kartagama nai suratkon Mpu Prapanca
Bahaso adong sada harajaon dot banua
Na tarbonggal tu jae-julu arani sun godangna

Sian maso i santak tu maso Ulando
Songon na gotap arani inda dong na tarsurat
Bo, si bontar mata on tong alak na “pistar” do
U tuliskon kalai antong bope na urang topet

“Dalihan Na Tolu” di ombar baloktaan
“Dalian Natolu” muse di tano rurantaan
Ima pardalanna ning sadebana so sarupo
Taiba ngajungada ita sise peto-peto

Di banua ni alak Marikin ninna “Demokrasi”
Isonpe songoni juo do da ning roangku ale pamasa
Jarupe le adua rap-rap mamake “Demokrasi”
Tai leng na marasing-asing doi caro mandalankonsa

Ahama luai so ra songkoni ?
Dalian Natolu i dabo “konsep” dei
Angkon nai baen dei “caro pardalanna”
Nai asal sian adat, ugari dot uhumta

Lain hal, aso do jajina alak kita
Na mian asa marpandaraman di Malaya
On boto inda tarcaritoon sise dison
Arani ginjangna nangkan obarkonon

Ninna na jolo koum-sisolkottai ke tusi
Arani Porang Padri atope karejo rodi
Oni i singkok balasting muse maso i
Adong juontong arani maturutuk na markahanggi

Inda lolot be adong mei sada pustaha
Namancaritoon aso do jaji na alak kita
Na kehe mamota-mota arangan dot paya-paya
Marparau siborang laut santak tu Malaya

Botimada jolo kahanggi gabe
Incogot aduan ita ulai muse

Horas Tano Rura Mandailing
Tano Omas Sigumorsing !!!

Balas

35. SDP Nasution Berkata
Mei 15, 2009 pada 4:09 am

“Onang onang ni na malungun tu huta”

Oo iiii da baya……
Na dangol ma da na dungil
Na dangolan do da na muil-uil
Songon dia do baya na so ganjil
Mala so marsipaidaan ,
Lungun do roha da baya….

Botul ma da na ni dok Mandailing
Na sada do dai Bungkulan na
Na lambok baya dipangkuling
Boti muse na denggan par roha na

Ale baya Mandailing…..
ha holongan……..

Horas Mandailing

Balas

36. edi nasution Berkata
Mei 15, 2009 pada 7:00 am

Iambang baya ARUTING rupana BAKOK do
Dapot atia mangkail i longko-longko
Taringot ibabo dompak marsiajar maposo
Ningkalai le: “sate-soto mate naoto”

I tatap ale tu dolok bahat tarida tor pangolat
I talion tu lombang amana bolak muse baya paya-paya
Tu lombang inda tarambur tu dolokpe inda tarlumpat
Inda bisa be tudia-dia arani “apit di tonga-tonga”

Ahamei tie ?

Balas

37. SDP Nasution Berkata
Mei 15, 2009 pada 9:45 am

Baen so dapot iba uling kulingn ni angkang i on ma bo tobus na….

Habang inda amporik
Manyipak inda le kudo
Aha mai luai…?

Horas Mandailing

Balas

38. edi nasution Berkata
Mei 15, 2009 pada 10:02 am

Ha … ha … ha …
Maro gitik-gitik i jo !!!
Au pe inda uboto ahai.
Anggo songoni :
“sada-sada da” !!!

Balas

=============Who’s next.

One Comment pada “MARENDE-ENDE”


  1. maaf mengganggu, jika anda tahu terjemahan dari lagu nasonang do hita tolong terjemahkan lagunya ke bahasa indonesia,
    terjemahan tolong di kirim ke blog saya
    “terimaksih”


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s


%d blogger menyukai ini: